María Elísa 7 ára

Hún María mín er 7 ára í dag. Var vakin með söng og pakka í rúmið í morgun. Það var glöð stelpa sem tölti í skólann í morgun með mikla tilhlökkun til dagsins. María, litla ljósið okkar, er alveg yndisleg stelpa, svo skapandi og skemmtileg.

Til hamingju með daginn þinn fallegi engillinn minn :-) Knúúús!

Hverslags blogg er þetta?

Þið sem lesið eða fylgjist með þessu bloggi og eruð vinir mínir á facebook, þið eigið eftir að sjá oft sömu hlutina hér inni og þar. Ég vona samt að ykkur leiðist það ekki... þetta blogg er hugsað eins og dagbók þannig ég geti „sest“ inn í tímavélina mína og farið aftur í tímann og upplifað góðar stundir aftur og aftur. Eigið góðar stundir.

Reyni að koma lífi í þetta blogg

Í dag notaði ég forrit/apps á facebook: My Top Status in 2011. Það er listi yfir 10 helstu statusa ársins 2011.

Þegar ég leit yfir statusana (hvað kallast þetta aftur á íslensku?) þá varð mér hugsað til þess þegar ég bloggaði alltaf á Gauksstöðum. Það var svo yndislegt að kíkja yfir allar færslurnar og sjá allt sem ég hafði verið að gera og hvað ég var að hugsa. Ég kom nefnilega meiru í verk en ég mundi eftir.

Þessi upprifjun fékk mig til þess að langa að byrja aftur að blogga... sem ég ætla núna að gera... sjáum nú hvernig það gengur ;-)

Jólaklippingin hjá börnunum

Sótti börnin snemma á frístundaheimilið í dag og var ferðinni heitið í klippingu í yndislega hverfinu okkar. Nú er hinni árlegu jólaklippingu semsagt lokið hjá börnunum. Þau voru svo stillt og kurteis að vanda að þau fengu sleikjó í verðlaun, sem þau voru frekar ánægð með svona á mánudegi. Í leiðinni afpantaði ég klippinguna, sem ég átti bókaða í næstu viku, þar sem ég ákvað að þetta lufsaðist alveg svona fram á nýtt ár :-) Við fengum svo mjög hressandi göngu á leiðinni heim. Heima drifum við svo af heimalærdóminn og tókum síðan fram bingóið og spiluðum... það er svo gaman að eiga svona stundir með þessum elskum :-) -Ág.

María mín orðin 6 ára

Jæja, þá er María mín líka búin að eiga afmæli orðin 6 ára stelpan en hún átti afmæli núna þann 7. Vá 6 ár liðin! Ég er ekki alveg að trúa þessu, það sem tíminn líður hratt. Skrýtið þar sem ég eldist ekkert sjálf ;-Þ. Þetta var í fyrsta skiptið sem María las afmæliskort sjálf... ekkert smá dugleg orðin að lesa og skrifa. Það sem maður elskar þessi börn sín, ég er ekkert smá rík :-)

Elsku María mín til hamingju með daginn þinn ég elska þig litla ljósið mitt :-)

Svavar minn orðinn 8 ára :-)

Litli engillinn minn varð 8 ára í gær þann 10. Ég er ekki alveg að trúa því að það séu strax komin átta ár frá því að Svavar kom í heiminn. Samt er eins og hann hafi alltaf verið hér með okkur... skrýtið hvernig tíminn hegðar sér. Hann Svavar minn er mér svo mikill fjársjóður rétt eins og systur hans... ég er svo rík og hamingjusöm móðir :-)

Elsku Svavar til hamingju með daginn þinn ég elska þig alveg upp í geim og til baka :-)

Falleg birta sem fylgir snjónum

Það er eitthvað sem gerist innra með mér þegar snjórinn byrjar að falla til jarðar og mynda hvítt teppi á jörðinni, finnst það alltaf svo heimilislegt og notalegt. Sennilega má rekja það til þess að vera alin upp á Norðurlandi. Myrkrið verður fyrir vikið ekki eins yfirgnæfandi og birtan sem kemur frá snjónum endurkastar birtu í sálartetrið.

Byrjað að blogga aftur

Jæja þá er ég komin með nýtt blogg hérna og mun þetta verða með svipuðu sniði og það gamla var. Hér eiga semsagt eftir að birtast hugrenningar mínar og það sem er mér efst í huga hverju sinni. Fyrir mér er þetta nefnilega nokkurskonar dagbók. Kv. Ág.